
遍知贝玛嘎波大师教言集PK29བཀྲ་ཤིས་མཐོང་སྨོན་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།།
4-266
༄༅། །བཀྲ་ཤིས་མཐོང་སྨོན་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།།
༄༅། །བཀྲ་ཤིས་མཐོང་སྨོན་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།། ༄༅།།རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །གང་གི་བསོད་ནམས་རྒྱ་མཚོའི་གཏིང་མཐའ་མི་མངོན་ཞིང་། །ཟབ་མོའི་ཡེ་ཤེས་མཚུངས་པ་མེད་པའི་རིན་ཆེན་གྱིས། །འཕྱུར་བུར་གཏམས་བྱས་ཕྱོགས་བཅུའི་ཁོང་བ་ཐུགས་རྗེ་ཡི། །རྦ་རླབས་ཀྱིས་བཀང་ཐུབ་པའི་དབང་པོས་དགེ་ལེགས་མཛོད། །གང་གི་ཞབས་སེན་འོད་ཟེར་རྒྱས་པ་ཉིད། །དཔང་པོར་བྱས་པའི་ལུས་ཅན་ཐམས་ཅད་ཀྱི། །
4-267
གཙུག་གི་རིན་ཆེན་གྱིའང་རྒྱན་འགོད་ལ། །དང་པོར་ཟས་གཙང་སྲས་འཁྲུངས་དེ་ཡིས་ཀྱང་། །སྲེད་པའི་རླན་རྣམས་མ་ལུས་བཏང་ནས་སྙིང་རྗེའི་གཤེར་ནི་རྒྱུད་ལ་གཟུང་། །འཁོར་བའི་འདམ་རྫབ་ཡོངས་སུ་བརྒལ་ནས་གཞན་གྱི་དོན་སླད་སྲིད་མཚོར་རོལ། །ཡོན་ཏན་གེ་སར་ཉིད་ཀྱིས་འཛིན་ཅིང་ཕན་བདེའི་ཟིལ་དངར་གཞན་ལ་བཀྱེ། །གདུལ་བྱའི་བུང་བ་ཉེ་བར་སྡུད་ཅིད་གྲགས་བའི་དྲི་བཟང་རིང་དུ་སྤྲོས། །ཐུབ་པ་དེ་སྲས་འགྲོ་ལ་རྗེས་ཆགས་ནས། །རང་རིགས་བརྒྱུད་ལ་གྲགས་པ་བསྒྲུབ་མཁས་པ། །ཟླ་བ་གསར་པ་ལྟ་བུར་འཇིག་རྟེན་ལ། །ཕན་པའི་བདུད་རྩི་སྟེར་བ་ཅི་ཡང་འཕེལ། །དེ་ནས་འཕགས་པའི་ཡུལ་ཀྱི་སྐྱེད་ཚལ་ཆེར། །གྲགས་པའི་མེ་ཏོག་ཚོགས་ཀྱི་ཆར་འབེབས་པའི། །པཎ་གྲུབ་དཔག་བསམ་ལྗོན་པ་ཅི་ཡང་གིས། །ཐར་འདོད་དགའ་མ་མྱོས་པའི་ལོངས་སྤྱོད་སྦྱར། །དེ་ཚེ་སྐྱེ་དགུའི་ཉི་མ་ཏི་ལོ་པ། །གྲུབ་རིགས་ཤར་གྱི་རི་བོའི་རྩེར་འཐོན་ནས། །ཐུབ་པའི་གཞུང་གི་པད་ཚལ་ཇི་སྙེད་པ། །དུས་ཀྱིས་ཉམས་པ་མེད་པའི་འོད་ཚོགས་སྤྲོས། །རྟོག་གེ་ངན་པའི་ཆང་གིས་ཆེར་འཁྲུལ་པའི། །མུ་སྟེགས་གླང་ཆེན་མྱོས་པའི་རིགས་པ་ཡི། །ང་རོ་མི་བཟད་བསྒྲགས་པ་ཁ་ཆེའི་རིའི། །སྨྲ་བའི་སེང་གེ་ནཱ་རོ་ཏ་པས་བཅོམ། །བྱང་ཕྱོགས་འགྲོ་ལ་ཐོག་མར་དཔལ་གྱི་སྒོ། །མི་རྗེ་གནམ་གྱིས་བསྐོས་པ་དེ་དག་གིས། །འགྲོ་ལ་འཕོངས་པ་མི་བཟད་ཞི་བའི་གནས། །
4-268
དགེ་བའི་སྲོལ་ནི་ཤིང་རྟས་བྲིས་ལྟར་སྦྱིན། །དེ་ནས་གྲངས་སུ་སུས་ཀྱང་མི་འཚལ་བའི། །བཤེས་གཉེན་རྒྱུ་སྐར་འཕྲེང་བའི་པདྨོ་ཡི། །ཐུབ་བསྟན་ཟླ་བའི་ངང་མོ་རྣམ་རྩེན་པའི། །ཁ་བ་ཅན་མཁའ་ཡིད་བཞིན་མཚོ་འདི་བཀང་། །བརྡ་སྤྲོད་གཞུང་གིས་སྔོན་མེད་མཁས་རྣམས་ཀྱི། །སྙིང་ལ་ཡ་མཚན་བྲི་བ་མར་པའི་ཞབས། །དམ་པའི་མཛད་པ་རྣམ་རྒྱས་དགེ་བའི་བཤེས། །དེ་ཡི་བརྒྱུད་དུ་གཏུགས་པ་མེད་པ་བྱུང་། །ལྷག་པར་གྲུབ་པ་བྱེ་བའི་ཟུར་ཕུད་ལ། །བཀའ་ཡི་ངལ་བསོ་རབ་བགྱིས་ཆོས་ཀྱི་རྒྱལ། །དཔལ་ལྡན་འབྲུག་པའི་དཀར་རྒྱུད་འཛིན་རྣམས་ཀྱིས། །མཆོག་གི་ས་ཡང་ཤིན་ཏུ་དོག་པར་བྱས། །རིང་ལུགས་དེ་འཛིན་དུས་ཀྱི་མཐའ་མ་ནའང་། །མི་རྗེ་ཁྲི་སྲོང་ལྡེ་བཙན་གང་གི་བློན། །ཁྲི་གཟིགས་རྒྱལ་པོའི་བྱ་བའི་རྩེར་སོན་བརྒྱུད། །ཆོས་རྒྱལ་བྱ་བ་ཞེས་བྱའི་ལྷ་སྲས་སུ། །རྒྱུ་མེད་བྱམས་པའི་ཐུགས་ཀྱིས་འཇིག་རྟེན་ལ། །མཆོག་ཏུ་ཕན་པ་མཛད་པས་མི་བསྙེངས་པའི། །སྙིང་རྗེའི་བདག་ཉིད་ཆོས་ཀྱི་གྲགས་པ་ཞེས། །རྒྱལ་སྲས་སྤྱོད་པ་སྟོན་པའི་མེ་ལོང་བྱུང་། ། དེ་ནི་དཔལ་འབྱོར་སྦྲང་རྩིས་བཅུད་པ་ངོ་མཚར་གེ་སར་ཕོན་པོ་ལ། །རྣམ་མང་དཔུང་གི་རྐང་དྲུག་གླུ་ལེན་ཁྲིམས་གཉིས་བསུང་གིས་གཟེངས་བསྟོད་པའི། །ཕྱོགས་ཀྱི་བུ་མོའི་རྣ་ལུང་དང་འགྲོགས་སྙན་པའི་ཨུཏྤལ་དོག་པ་ཡིས། །རྒྱ་ཆེན་ཆུ་གཏེར་སྐ་རགས་རབ་བཅིངས་ནོར་འཛིན་ཀུན་དགར་བྱེད་པའི་དུས། །
4-269
ཚངས་པའི་དྲང་སྲོང་ཀུན་གྱི་ཁེངས་འཕྲོག་པའི། །མི་ལ་རས་པས་ཉིད་སྲས་རས་ཆུང་པར། །བདེ་ཆེན་གསང་བའི་ཕུག་ལྡན་རི་ངོས་སུ། །མཐའ་མའི་གདུལ་བྱ་རྗེསུ་གཟུང་གདམས་བཞིན། །ཡབ་ཀྱི་བཀའ་ལུང་རི་ལས་ནམ་ཡང་ནི། །འགོང་བ་རབ་སྤངས་རྡོ་རྗེ་གྲགས་པས་ཀྱང་། །ལྕང་ལོ་ཅན་ནས་མངོན་སུམ་དེར་འོངས་ཏེ། །ཟབ་མོའི་ལམ་བསྟན་གནས་དུས་ལུང་བསྟན་མཛད། །བདུད་རྩི་འཛག་པའི་ནུ་འབུར་ཅན། །འདྲེན་བྱེད་གཡོ་བའི་ཟོལ་གྱིས་ནི། །སྲིད་ལྡན་བཞིན་ལ་རྒྱ་སྐྱེགས་ཀྱི། །ཁུ་བ་རབ་བྱུགས་སུ་ཁ་མས། །འདི་ནས་ནུབ་ཀྱི་ཕྱོགས་སུ་ཁྱོད་སོང་ན། །དཔལ་ལྡན་ལྷ་ཡི་རི་བོ་མངྒལ། །གངས་ཅན་འཛིན་མའི་ཐིག་ལེ་ལེགས་བྱས་ཀྱིས། །ཉེ་བར་བསྒྲུབས་དང་གདུལ་བྱ་འདུ་བར་འགྱུར། །ལུང་བསྟན་བཞིན་དུ་གངས་རིའི་ཁོར་ཡུག་ཅན། །སྨན་ལྗོངས་ནགས་ཚལ་བཟང་པོས་མཐོན་མཐིང་དུ། །སྣང་བའི་ས་གཞིར་བཀོད་ལེགས་གྲོང་གི་འཕྲེང་། །དཔལ་གྱི་འབྱོར་བས་གང་བའི་ལོ་གྲོ་ནི། །སྔོ་བསངས་ནམཁའི་སྐྱེད་ཚལ་ཡིད་འོང་པར། །རྒྱུ་སྐར་དགའ་བའི་འཁོར་གྱིས་ཡོངས་བསྐོར་བ། །དྲི་མེད་བདུད་རྩིའི་བཏུང་བས་མྱོས་གྱུར་བའི། །ཀུན་དགའི་བཞིན་ལྡན་ཟླ་བ་འཁྱམ་པ་བཞིན། །སྐྱེ་བོ་མང་པོ་དེ་ན་འདུ་བ་དང་། །འབྱོར་བ་དུ་མས་བརྒྱན་པའི་ཚོང་འདུས་དང་། །ཡ་མཚན་དཔལ་ཡོན་ཡོངས་ཀྱིས་གཏམས་པས་ནི། །མཐོ་རིས་བདེ་བ་རྫོགས་པར་འཕོས་པ་བཞིན། །
4-270
དེ་དབུས་ཟླ་ཤེལ་བརྩེགས་པ་ལྟ་བུའི་རི། །ཡ་རབས་རྣམས་ཀྱི་གཟེངས་ལྟར་མཐོ་བ་དང་། །བུང་བའི་འཕྲེང་འཁྲིགས་གཉིས་འཐུང་འགྱིང་འདྲ་བའི། །ངོགསུ་ཆོས་ཀྱི་སྡེ་ཆེན་རབ་ཏུ་བཙུགས། །བཅུ་ཕྲག་བརྒྱད་དང་བཞིས་ལྷག་གྲུབ་པའི་དབང་། །འདབ་ཆགས་དབང་པོར་སྤྲུལ་ནས་དེར་བྱོན་ཏེ། །ཡིད་སྲུབས་སྒྱུ་མའི་འཁྲུལ་འཁོར་ཇི་སྙེད་ལས། །བསྲུང་བའི་ར་བ་མཛད་ལས་གཡེལ་མ་གྱུར། །མ་སྨད་ཕུན་ཚོགས་གཞལ་མེད་ཁང་བརྩེགས་གང་། །བརྒྱ་ཕྲག་དུ་མའི་ཁང་བུས་ལེགས་བསྐོར་བས། །ས་རྣམས་མ་ལུས་བཀྲ་ཤིས་ལྡན་བྱེད་ལ། །བལྟ་ན་སྡུག་གི་གྲོང་ཁྱེར་འོངས་པ་བཞིན། །ནམཁའ་མཛོད་དང་མཉམ་པའི་འབྱོར་པ་ནི། །མ་ཆགས་དེ་ཡི་ཆེད་དུ་སྦྱིན་བྱས་པས། །མཁས་དང་གྲུབ་པའི་སྐྱེ་བོ་གྲངས་མེད་པ། །མངོན་པར་འདུ་བའི་འདུན་ས་ཉིད་དུ་གྱུར། །དེ་ན་མི་ཟད་ཆོས་ཚུལ་ཆུ་གཏེར་གང་། །མཁས་གྲུབ་ཀླུ་དབང་སྟོང་གིས་ཡོངས་གཟུང་ཞིང་། །ཞག་རེར་བཤད་སྒྲུབ་ཟླ་བས་རྣམ་སྤེལ་བས། །ཕན་བདེ་རིན་ཆེན་འབྱུང་བའི་གནས་སུ་གྱུར། །བཀྲ་ཤིས་ལྷ་ཡི་འབྱོར་པཪ་མངའ་མཛད་ཅིང་། །རིག་པའི་གནས་ལ་ཕུར་བུའི་བློ་ལྡན་པས། །ཕྱོགས་ལས་རྣམ་པར་རྒྱལ་བའི་མཚན་འཛིན་པ། །ལྷ་དེའི་གཅུང་གི་རིང་ལ་དར་བར་མཛད། ། དེ་སྲས་བཀའ་ཁྲིམས་སྤྲིན་པའི་དབྱངས་ཀྱིས་རི་དབང་གི་ནི་མྱོས་བུམ་ཅན། །ཆུ་གཏེར་བཞི་ཡི་སྐ་རགས་གཡོ་ལྡན་ནོར་འཛིན་བུ་མོའི་ཕང་པ་ནང་། །
4-271
སྐྱེ་དགུའི་གཙུག་ཕུད་ཅན་དག་དགེ་བ་བཅུ་ཡི་ཟློས་གར་ལ་སྦྱོར་བའི། །མི་ཡི་དབང་ཕྱག་བསྟན་འཛིན་ནོར་བུ་ཞེས་བྱས་ལྷག་པར་མཆོད་པའི་ཚེ། །སྔོན་ཡང་འགྲོ་བའི་བསོད་ནམས་ཆེད། །རྒྱལ་བའི་བསྟན་ལ་མཛད་པའི་ཕུལ། །ཅི་ཡང་བགྱིས་མོད་ལྷག་མ་ཡི། །ཆ་ཤས་ཙམ་ཞིག་བསྒྲུབ་པའི་ཕྱིར། །སྨོན་ལམ་རི་བོང་ཅན་གཟུགས་དང་བའི་མཚོར། །རབ་སྦྱངས་པདྨ་དཀར་པོའི་སྡོང་བུ་ནི། །སྙིང་རྗེའི་གེ་སར་ཅི་ཡང་འཁྲིགས་པ་ཡི། །བློ་གྲོས་ཟིལ་དངར་རྒྱས་པ་འདི་བྱུང་ངོ་། །མཁས་ཤིང་གསལ་ལ་ཡིད་གཞུངས་དེ་ཡི་ཚིག །རྣམ་དཔྱོད་ལྡན་པ་རྣམས་ཀྱི་མགོ་བོ་དང་། །དེ་ཡི་ཡོན་ཏན་དག་གི་སྙིང་ལ་ནི། །མེ་ཏོག་གསར་པའི་དོག་པ་ལྟ་བུར་འཁྱུད། །ལྷུན་པོ་གཉིས་པ་ལྟ་བུར་གཟི་ཆགས་ཤིང་། །ཡངས་པའི་ས་གཞི་འདྲ་བར་རྒྱ་ཆེ་བ། །བལྟ་བས་ངོམས་པ་མེད་པའི་གཙུག་ལག་ཁང་། །ཁ་བ་ཅན་དུ་སྔོན་མེད་དེས་བསྒྲུབས་སོ། །གྲུ་བཞི་མཉམ་པས་ལྷམ་མེར་མཛེས་ཤིང་གློ་འབུར་བརྩེགས་མས་ཀུན་ནས་དཀྲིས་པའི་གེ་སར་འཛུམ་པས་རྒྱུ་སྐར་རྣམས་ཀྱང་འོད་ཟེར་རྩེ་ལ་འཛིན་པར་རྩོམ། །དམ་པ་རྣམས་ཀྱིས་དགེ་བའི་སླད་དུ་མངའ་ཡབ་རིན་ཆེན་རྩེ་དགའ་རྒོད་ཅིང་རླུང་གིས་བསྐུལ་བའི་དྲིལ་བུའི་སྒྲ་སྙན་ཕྱོགས་རྣམས་འབོད་པའི་ཟོལ་གྱིས་གནས། །གསེར་མདོག་བ་གམ་ལྷག་པར་དངས་པས་ཀུན་གསལ་གདོང་ལ་གུར་ཀུམ་བྱུག་ཅིང་རྡོ་བའི་རྩིག་པས་ནོར་བུའི་བྲག་གི་ཁེངས་པ་ཐམས་ཅད་འཕྲོག་པ་དང་། །
4-272
རྡོ་ཐལ་གྱིས་བྱུགས་གངས་རིའི་ཕུང་པོར་དོགས་པ་དང་ལྡན་ཡ་མཚན་དགའ་སྟོན་ཅི་ཡང་བལྟ་ཕྱིར་རིང་ནས་འོངས་རྣམས་མཉམ་པའི་ཁོང་སར་འཁོད་གྱུར་པའི། །ནང་ན་ཆེར་དངས་ཞལ་ཞལ་ཀ་བ་ས། །གང་དུ་ཡིད་འོད་གཟུགས་བརྙན་གཅིག་ཉིད་ཀྱང་། །དུ་མའི་རྣམ་པ་འཛིན་པ་འདིའི་འགྲན་ཟླ། །རྣམ་པར་རྒྱལ་བའི་ཁང་བཟང་མིན་པ་སུ། །ཀ་བ་རབ་དམར་གདུང་མདོག་མཐོན་མཐིང་ལ། །སྣ་ཚོགས་ཚོན་རིགས་བརྩིགས་བྱས་བཀྲ་བའི་དོགས། །གསེར་གྱི་པ་ཏྲའི་རི་མོ་ཅི་ཡང་གིས། །མཛེས་འདི་འཆར་ཀ་ལ་མིན་ཉི་མར་མིན། །དགེ་བའི་གཙུག་ལག་ཁང་འདི་སྔོན་དུས་ཀྱི། །རྒྱལ་བའི་རྟོག་པ་བརྗོད་པའི་ཡ་མཚན་འཕྲེང་། །མཆོག་ཏུ་བཀྲ་ཤིས་བྱེད་པའི་གཟུགས་བརྙན་ནི། །རང་གི་གྲགས་པ་བཞིན་དུ་གསལ་བར་བྲིས། །གང་གི་ཕྱོགས་འདིར་རི་མོའི་སྲིད་ཞུ་ཡི། །སྦྲང་རྩི་སྟོང་གིས་དགའ་བ་མ་ཐོབ་པའི། །བསྟན་འདིར་བཀའ་དྲིན་མཚུངས་མེད་མཁས་གྲུབ་གཞན། །སྦྲང་རྩི་སྤྱོད་པ་བཞིན་དུ་འགར་ཡང་མེད། །སྣ་ཚོགས་རིན་ཆེན་མདངས་འཛིན་ཚོན་ཚོགས་པའི། །འོད་ཟེར་དྲི་མེད་བཀྲ་བ་འདི་ཉིད་ཀྱིས། །ཕྱོགས་རྣམས་མཛེས་སྡུག་འཁྱིལ་བར་བྱེད་པ་ཡི། །ནུས་པ་བརྒྱ་ཕྲག་བརྒྱ་བྱིན་མཚོན་ལའང་མིན། །དེ་འདྲའི་གཞལ་མེད་ཁང་གི་ཆུ་གཏེར་ནས། །འགྲོ་བའི་ཡིད་ཀྱི་འདོད་འཇོ་རྒྱལ་བའི་སྐུ། །བདུད་རྩིའི་སྤུན་ཟླ་གྱུར་པ་དཔག་བསམ་ཤིང་། །བསོད་ནམས་ཟོང་གིས་བསྲུབས་ལས་འཐོན་པར་གྱུར། །
4-273
ཀུན་མཁྱེན་ཡེ་ཤེས་སྒྲོན་མས་ཤེས་བྱ་མཐའ་དག་སྣང་བྱས་འཇིག་རྟེན་གསུམ་གྱི་དཔང་གཅིག་པུ། །ཉི་མ་འཆར་ཀ་བྱེ་བ་ལྟ་བུར་རབ་གསལ་འོད་ཟེར་རྒྱས་པས་སྲིད་པ་གསུམ་བཀང་ནས། །མཐོ་རིས་ལ་གནས་ཚངས་དང་དྲག་པོ་ལ་སོགས་མི་དང་ལྷ་དང་གྲུབ་པ་དྲི་ཟ་ཀླུའི། །གཙུག་གི་རིན་ཆེན་ཞབས་ཀྱིས་མནན་བཞུགས་བདེ་བར་གཤེགས་པའི་གཟུགས་ཀྱི་སྐུ་ཡི་སྣང་བརྙན་ནི། །སྔོན་ཚེ་རི་མོ་མཁན་གྱིས་མ་ནུས་པ། །རང་གི་སྐུ་གཟུགས་རས་ལ་བཀོད་མཛད་དང་། །མཚུངས་པར་བལྟ་བས་མི་ངོམས་མཛེས་པའི་དཔྱིད། །རིན་ཆེན་རྒྱུ་ལས་ཤིན་ཏུ་ཆེ་བར་བསྒྲུབས། །ཛམ་བུ་ན་དཱིའི་རི་འདྲ་མཚན་དཔེ་འབར་བའི་དཔལ་གྱིས་བརྗིད་པ་དང་། །འཛུམ་པའི་ཞལ་མངའ་བསམ་གཏན་ལ་ཆགས་སྤྱན་ནི་ཟིམ་བུར་གཟིགས་པ་ཡི། །ཕྲག་མཛེས་དཔུང་པ་པུས་མོའི་བར་ནི་མངོན་དགའ་འོད་ཀྱིས་ལྷམ་མེ་པ། །སེང་གེའི་ཁྲི་ལ་བཞུགས་ཏེ་བསོད་ནམས་ཅི་ཡང་སྤེལ་བའི་ཞིང་དུ་གྱུར། །ནུ་མའི་ཐོ་ཀོར་དོ་ཤལ་གྱིས་བརྒྱན་མིག་དཀྱུས་རིང་པོས་རྣ་བའི་ཨུཏྤལ་ལ་འགྲན་པའི། །ཟེའུ་འབྲུ་གསར་པའི་དྲི་གཞོན་གྱིས་མྱོས་བུང་བ་འཁོར་བའི་མནྡར་བའི་ཅོད་པན་ཅན། །དྲིལ་ཆུང་སྒྲ་ཡི་རྗེས་འབྲེལ་རབ་ཏུ་གསལ་བའི་རྐང་གདུབ་ཡིད་འོད་སྐད་སྙན་སྒྲོགས་པ་ཡིས། ལྷ་ཡི་བུ་མོ་ན་གཞོན་མ་རྣམས་གུས་པ་དང་བཅས་མེ་ཏོག་རྡུལ་གྱིས་མཆོད་པར་བྱེད། །
4-274
ལེགས་སྤྱད་ས་ལ་འཁྱུད་པས་རྩོད་པའི་དུས། །རྫོགས་ལྡན་དཔུང་གིས་བཅོམ་པའི་དགའ་སྟོན་སླད། །རྒྱལ་བའི་མཚན་མ་རྟོག་བཅས་བཀོད་པ་ནི། །གངས་ཅན་རི་བོའི་རྩེ་བཞིན་མཁའ་ལ་སྙེག །བཀྲ་ཤིས་དུས་སྟོན་དུས་ནི་ཡིད་འོང་པ། །དམ་པའི་སྤྱོད་པས་འདའ་བའི་སྐྱེ་བོ་ལ། །ཞིང་གིས་འཚོ་བ་རྣམས་ལ་ལོ་ཐོག་བཞིན། །དེ་ནི་ནམ་ཡང་དུས་ལས་ཡོལ་བ་མེད། །བསོད་ནམས་ལྡན་པ་རྣམས་ཀྱི་མིག །པདྨའི་འདབ་མ་ལྟར་ཡངས་པ། །གང་གིས་མཐོང་བ་དེ་དག་ནི། །འདི་ཡི་ཕྱོགསུ་ལྷུང་བར་འགྱུར། །དགའ་བ་རྒྱ་ཆེ་དང་འགྲོགས་ནས། །སྤྲོ་བའི་ཤིང་རྟ་རབ་འཛེགས་ཏེ། །དགེ་མཚན་རི་མོར་འདྲི་བའི་ཡིད། །ཐམས་ཅད་ཀྱང་ནི་འདི་ལ་སྨོན། །གང་གི་བཀའ་ནི་ས་སྐྱོང་རྣམས་ཀྱི་མགོར། །དྲི་མེད་རེན་ཆེན་གསེར་གྱི་ཅོད་པན་བཞིན། །འཆིང་མཛད་མི་རྗེ་མཚོ་སྐྱེས་རྡོ་རྗེ་དེ། །བློན་འབངས་བཙུན་མོར་བཅས་པས་སྦྱིན་བདག་མཛད། །རིག་བྱེད་མཁས་པའི་རྩེར་སོན་འབའ་ཞིག་གིས། །ལྔ་ཕྲག་ལོ་ལ་རྫོགས་པར་འདི་བསྒྲུབས་ཚེ། །འདི་ནི་སྒྱུ་མའི་འཕྲུལ་ལས་གཞན་མིན་སྙམ། །དཔྱོད་ལྡན་ཡིད་ལ་བསམ་བྱའི་གོ་སྐབས་སྦྱིན། །གཡུལ་ངོར་དཔའ་བའི་དཔུང་འཛིན་ཕྱག་བཞི་པས། །བདུད་སྡེ་མིང་ཙམ་ལྷག་མར་མཛད་ནས་ཀྱང་། །རང་སྡེ་སྐྱོང་ལ་སྙེངས་པ་མི་མངའ་བའི། །གྲགས་པས་ཁོར་ཡུག་རི་བོའང་བརྒལ་བར་བྱས། །དམར་བས་ཉི་མ་འཆར་ཀ་ཟིལ་གནོན་ཞིང་། །
4-275
ཁྲོ་བས་དགྲ་བོའི་མཐར་བྱེད་ཉིད་གྱུར་པའི། །ཅིག་ཅར་དམར་པོར་གྲགས་ངེས་གནས་འདི་ཡི། །བསྲུངས་མའི་ཐུ་བོ་མཛད་པར་ཞལ་གྱིས་བཞེས། །ཕྱོགས་འདིར་འབད་པའི་སྐྱེ་བོ་ཐམསཅད་ཀྱིས། །ངན་འགྲོའི་སྒོ་བཅད་མཐོ་རིས་རྟེན་ཐོབ་སྟེ། །བྱང་ཆུབ་ལམ་ལ་ཞུགས་ནས་མྱུར་བར་ནི། །རྫོགས་པའི་སངས་རྒྱས་ཐོབ་པ་ཉིད་གྱུར་ཅིག། ། བདག་གི་བློ་གྲོས་དགེ་བས་བསྒྲུབས་པ་རྒྱལ་བའི་གཙུག་ལག་ཁང་ཆེན་པོར། །སངས་རྒྱས་སྐུ་འདིས་སྲིད་པ་འདྲེན་ཞིང་ཆོས་ཀྱི་ལེགས་བྱས་ལམ་དག་གསལ་བ་དང་། །དགེ་འདུན་ལུས་ཅན་རྣམས་ལ་དགེ་བའི་ཚོགས་སྦྱིན་ནམཁའ་ཇི་སྲིད་པར། །དེ་སྲིད་ཅུང་ཟད་ཉམས་པ་མེད་པས་གནས་པར་གྱུར་ཅིང་དར་བར་ཤོག །ཟླ་བའི་མ་མ་རོ་ལྡན་མ། །རྫོགས་ལྡན་དགའ་སྟོན་ལ་སྤྱོད་ཅིང་། །ལུས་ཅན་ཀུན་ཀྱང་ཕུན་ཚོགས་ཀྱི། །ལོངས་སྤྱོད་དག་གིས་དར་བར་ཤོག །བྱ་ཡུལ་མི་དབང་ཆབ་སྲིད་བརྟན་པ་དང་། །མངའ་འབངས་བདེ་སྐྱིད་ཕུན་སུམ་ཚོགས་པ་ཡིས། །བཤད་དང་སྒྲུབ་བའི་ཐུབ་བསྟན་རིན་པོ་ཆེ། །ས་འདིར་རིང་དུ་གནས་ཤིང་རྒྱས་གྱར་ཅིག །དྲང་སྲོང་ཟླ་དབང་ཚིག་བསྐུལ་སྤྲིན་གྱི་དབྱངས། །རྣ་བའི་བཅུད་ལེན་བགྱིས་པར་སྙན་དངགས་མཁན། །རྨ་བྱ་གཞོན་ནུས་དམ་པའི་ཆུ་འཛིན་ལ། །དགའ་བ་རྒྱས་པའི་ཚིག་མང་ཅ་ཅོར་བགྱིས། །སྨན་གྱི་དྲང་སྲོང་ཟླ་བའི་དབང་པོས་བཀྲ་ཤིས་མཐོང་བས་སྨོན་པའི་འཕྲུལ་གྱི་གཙུག་ལག་ཁང་འདིའི་དཀར་ཆག་ཅིག་ཡི་གེར་འདེབས་དགོས་ཞེས་བསྐུལ་བ་ལྟར། པདྨ་དཀར་པོས་གནས་དེ་ཉིད་དུ་སྦྱར་བའོ།། ༎སརྦ་མདྒལཾ༎


目录
བཀྲ་ཤིས་མཐོང་སྨོན་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།།